Presidenca e Kosovës hedh poshtë pretendimet e Beogradit se dekretimi i gjyqtarëve dhe prokurorëve serbë do të ndodh nesër. Dekretimi i këtyre gjyqtarëve i cili ishte paraparë të ndodhte të martën nga kreu i shtetit të Kosovës nuk u bë, kjo pasi të njëjtët, nuk shkuan për t’u betuar para Thaçit. Për dështimin e zbatimit të kësaj marrëveshjeje ka pasur reagime edhe nga ndërkombëtarët si ndërmjetës në dialogun Kosovë – Serbi.

Drejtori i Zyrës për Kosovën, Marko Gjuriq ka thënë sot se pala serbe nesër do të jetë e gatshme për krijimin e një gjykate dhe një prokurorie të re me shumicë serbe në veri të Kosovës.

Por nga Zyra e Presidentit e kanë përgënjeshtruar këtë lajm, duke sqaruar se dekretimi i gjyqtarëve dhe prokurorëve serbë ndodh vetëm atëherë kur vendos Presidenti Hashim Thaçi.

“Dekretimi i gjyqtarëve dhe prokurorëve të komuniteteve jo shumicë, bëhet vetëm atëherë, kur për këtë vendos Presidenti i Kosovës”, thuhet nga Presidenca për Express, e cila të martën pas dështimit të zbatimit të marrëveshjes së Drejtësisë, lëshoi akuza ndaj Beogradit, duke e quajtur këtë edhe një paaftësi të Bashkimit Evropian.

Presidenti shtoi se dekretimi i gjyqtarëve dhe prokurorëve nga komunitetet joshumicë në Republikën e Kosovës, është edhe një nga masat afirmative, të cilat institucionet e Republikës së Kosovës i ndërmarrin për të arritur një barazi të plotë dhe efektive të pjesëtarëve të komuniteteve në të gjitha fushat e jetës, ekonomike, shoqërore, politike dhe kulturore.

Hashim Thaçi dhe presidenti i Serbisë, Aleksandar Vuçiq, në takimin e muajit gusht në Bruksel, u pajtuan për zbatimin e plotë të Marrëveshjes për drejtësinë, konkretisht integrimin e gjyqtarëve e prokurorëve në sistemin e drejtësisë të Kosovës.

Sipas marrëveshjes së arritur, gjyqtarët dhe prokurorët më 17 tetor do të duhej të integroheshin në sistemin e drejtësisë të Kosovës, por që një gjë e tillë dështoi të ndodhte.

Edhe nga zyra e shefes për Politikë të Jashtme, Federica Mogherini, në një përgjigje dhënë të martën për Gazetën Express, kanë bërë të ditur se Beogradi ka bërë kërkesën për shtyrje të zbatimit të kësaj Marrëveshjeje, edhe pse theksuan se integrimi i saj është i rëndësishëm për zbatimin e Marrëveshjes së Dialogut mbi drejtësinë.

Ndaj moszbatimit të kësaj marrëveshjeje reagoi edhe Ambasada Amerikane në Kosovë të cilët kërkuan që të dyja palët të dakordohen për një afat tjetër kohor në një të ardhme të afërt./GazetaExpress/