Ministri i Arsimit, Shkencës e Teknologjisë, Shyqiri Bytyqi, ka folur për problemin e gjuhës diskriminuese e ofenduese në tekstet shkollore.

Ai ka thënë se janë duke u marrë me rishikimin e teksteve të tilla, sepse ka shumë ankesa nga prindërit, mësimdhënësit e organizatat ndryshme.

“Jemi duke bërë një analizë të mirëfilltë të teksteve shkollore. Informatat e para që i kemi edhe nga analiza e ekspertëve, rezulton se ka libra të kualitetit të dobët – me gabime shkencore dhe elemente diskriminuese”, ka deklaruar Bytyqi në një intervistë për Telegrafin.

“Jemi zotuar që ta bëjmë një zgjidhje të shpejtë kur të bëhet rishikimi i të gjitha librave”, ka thënë ai.

Sipas tij, në fund të vitit do të fillojë debati gjithëpërfshirës për këtë temë.

“Fëmijët tanë janë të barabartë dhe ne duhet t’i vlerësojmë më të gjitha nevojat dhe kërkesat që kanë “, ka vlerësuar Bytyqi.