“Pandemia e koronës nuk kurseu as bujqësinë. Ajo gjithashtu ka çuar në shumë çrregullime të tregut. Sidoqoftë, gjithçka mund të ndalet, por jo edhe prodhimi i ushqimit. Kemi shumë punë për të bërë dhe kemi vendosur agjendë ambicioze. Për ta realizuar atë, së bashku me bujqit, do të duhet të ndjekim standardet evropiane, të zbatojmë arritjet dhe teknologjitë më të fundit dhe të zbatojmë mekanizimin modern”, tha ministri i Bujqësisë Arjanit Hoxha, në fjalimin e sotëm me rastin e 100 ditëve nga marrja e detyrës.

Hoxha paralajmëroi 150 milionë euro mbështetje financiare, kushte për prodhim më fitimprurës, subvencione për furnizim me “naftë të gjelbër”, konsolidimin e zonave, inkurajimin e bujqve të rinj me 20,000 euro grante të pakthyeshme dhe gratë fermere me 6,000 euro.

Ministri njoftoi se investimet kapitale për ujin e pijshëm dhe ujitjen do të vazhdojnë, si dhe pagesa jo selektive e subvencioneve. Rreth 115 milionë euro janë paguar deri më tani nga subvencionet e parashikuara, kurse deri në fund të vitit mbështetja do të përfundojë plotësisht, duke përfshirë borxhet mbi këtë bazë nga qeveria e mëparshme.

“Në 100 ditët e para të mandatit tim, kam pasur një seri takimesh bilaterale me homologë nga rajoni, SHBA-ja, Rusia, kryesisht për të gjetur mekanizma për të rritur tregtinë me produkte bujqësore, veçanërisht eksportet. Në këtë periudhë të shkurtër të marrjes së detyrës, realizova takime me vreshtarët, blegtorët, prodhuesit e orizit, prodhuesit e duhanit, prodhuesit e mollëve, vizitova shumë ferma dhe qendra të blerjes”, tha ministri në raportin për punën e bërë.

Ai përkujtoi se Qeveria ndërhyri dhe arriti të lehtësojë situatën në vreshtarinë dhe prodhimin e verës, të cilat ishin të parat që ndjenë goditjen e pandemisë COVID. U nënshkruan 540 kontrata për blerje të traktorëve dhe u ndanë edhe kontratat e para për 20,000 euro mbështetje të pakthyeshme për bujqit e rinj deri në 40 vjet. Kushtet u plotësuan nga 265 aplikantë dhe vlera e përgjithshme e mbështetjes do të jetë 3.1 milionë euro. Vitin e kaluar, mbështetja ishte dy herë më pak, 10,000 euro.

Ministri vlerëson se është bërë përparim i madh në bashkëpunimin ndërkombëtar. Në këtë kontekst, ai përmendi Marrëveshjen e nënshkruar me Shqipërinë për kontroll fitosanitar.